Sukta 51
Mandala 5 · 15 rks
15 rks · free forever
Listen at your pace. New audio may take a moment to prepare. Narration settings
Rk 1
अग्ने॑ सु॒तस्य॑ पी॒तये॒ विश्वै॒रूमे॑भि॒रा ग॑हि दे॒वेभि॑र्ह॒व्यदा॑तये
Rk 2
ऋत॑धीतय॒ आ ग॑त॒ सत्य॑धर्माणो अध्व॒रम् अ॒ग्नेः पि॑बत जि॒ह्वया॑
Rk 3
विप्रे॑भिर्विप्र सन्त्य प्रात॒र्याव॑भि॒रा ग॑हि दे॒वेभिः॒ सोम॑पीतये
Rk 4
अ॒यं सोम॑श्च॒मू सु॒तोऽम॑त्रे॒ परि॑ षिच्यते प्रि॒य इन्द्रा॑य वा॒यवे॑
Rk 5
वाय॒वा या॑हि वी॒तये॑ जुषा॒णो ह॒व्यदा॑तये पिबा॑ सु॒तस्यान्ध॑सो अ॒भि प्रयः॑
Rk 6
इन्द्र॑श्च वायवेषां सु॒तानां॑ पी॒तिम॑र्हथः ताञ्जु॑षेथामरे॒पसा॑व॒भि प्रयः॑
Rk 7
सु॒ता इन्द्रा॑य वा॒यवे॒ सोमा॑सो॒ दध्या॑शिरः नि॒म्नं न य॑न्ति॒ सिन्ध॑वो॒ऽभि प्रयः॑
Rk 8
स॒जूर्विश्वे॑भिर्दे॒वेभि॑र॒श्विभ्या॑मु॒षसा॑ स॒जूः आ या॑ह्यग्ने अत्रि॒वत्सु॒ते र॑ण
Rk 9
स॒जूर्मि॒त्रावरु॑णाभ्यां स॒जूः सोमे॑न॒ विष्णु॑ना आ या॑ह्यग्ने अत्रि॒वत्सु॒ते र॑ण
Rk 10
स॒जूरा॑दि॒त्यैर्वसु॑भिः स॒जूरिन्द्रे॑ण वा॒युना॑ आ या॑ह्यग्ने अत्रि॒वत्सु॒ते र॑ण
Rk 11
स्व॒स्ति नो॑ मिमीताम॒श्विना॒ भगः॑ स्व॒स्ति दे॒व्यदि॑तिरन॒र्वणः॑ स्व॒स्ति पू॒षा असु॑रो दधातु नः स्व॒स्ति द्यावा॑पृथि॒वी सु॑चे॒तुना॑
Rk 12
स्व॒स्तये॑ वा॒युमुप॑ ब्रवामहै॒ सोमं॑ स्व॒स्ति भुव॑नस्य॒ यस्पतिः॑ बृह॒स्पतिं॒ सर्व॑गणं स्व॒स्तये॑ स्व॒स्तय॑ आदि॒त्यासो॑ भवन्तु नः
Rk 13
विश्वे॑ दे॒वा नो॑ अ॒द्या स्व॒स्तये॑ वैश्वान॒रो वसु॑र॒ग्निः स्व॒स्तये॑ दे॒वा अ॑वन्त्वृ॒भवः॑ स्व॒स्तये॑ स्व॒स्ति नो॑ रु॒द्रः पा॒त्वंह॑सः
Rk 14
स्व॒स्ति मि॑त्रावरुणा स्व॒स्ति प॑थ्ये रेवति स्व॒स्ति न॒ इन्द्र॑श्चा॒ग्निश्च॑ स्व॒स्ति नो॑ अदिते कृधि
Rk 15
स्व॒स्ति पन्था॒मनु॑ चरेम सूर्याचन्द्र॒मसा॑विव पुन॒र्दद॒ताघ्न॑ता जान॒ता सं ग॑मेमहि