Sukta 37

Rk 1

वार्त्र॑हत्याय॒ शव॑से पृतना॒षाह्या॑य च इन्द्र॒ त्वा व॑र्तयामसि

Rk 2

अ॒र्वा॒चीनं॒ सु ते॒ मन॑ उ॒त चक्षुः॑ शतक्रतो इन्द्र॑ कृ॒ण्वन्तु॑ वा॒घतः॑

Rk 3

नामा॑नि ते शतक्रतो॒ विश्वा॑भिर्गी॒र्भिरी॑महे इन्द्रा॑भिमाति॒षाह्ये॑

Rk 4

पु॒रु॒ष्टु॒तस्य॒ धाम॑भिः श॒तेन॑ महयामसि इन्द्र॑स्य चर्षणी॒धृतः॑

Rk 5

इन्द्रं॑ वृ॒त्राय॒ हन्त॑वे पुरुहू॒तमुप॑ ब्रुवे भरे॑षु॒ वाज॑सातये

Rk 6

वाजे॑षु सास॒हिर्भ॑व॒ त्वामी॑महे शतक्रतो इन्द्र॑ वृ॒त्राय॒ हन्त॑वे

Rk 7

द्यु॒म्नेषु॑ पृत॒नाज्ये॑ पृत्सु॒तूर्षु॒ श्रवः॑सु च इन्द्र॒ साक्ष्वा॒भिमा॑तिषु

Rk 8

शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम् इन्द्र॒ सोमं॑ शतक्रतो

Rk 9

इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ इन्द्र॒ तानि॑ त॒ आ वृ॑णे

Rk 10

अग॑न्निन्द्र॒ श्रवो॑ बृ॒हद्द्यु॒म्नं द॑धिष्व दु॒ष्टर॑म् उत्ते॒ शुष्मं॑ तिरामसि

Rk 11

अ॒र्वा॒वतो॑ न॒ आ ग॒ह्यथो॑ शक्र परा॒वतः॑ उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि