Sukta 20

Rk 1

भ॒द्रं नो॒ अपि॑ वातय॒ मनः॑

Rk 2

अ॒ग्निमी॑ळे भु॒जां यवि॑ष्ठं शा॒सा मि॒त्रं दु॒र्धरी॑तुम् यस्य॒ धर्म॒न्त्स्व१॒॑रेनीः॑ सप॒र्यन्ति॑ मा॒तुरूधः॑

Rk 3

यमा॒सा कृ॒पनी॑ळं भा॒साके॑तुं व॒र्धय॑न्ति भ्राज॑ते॒ श्रेणि॑दन्

Rk 4

अ॒र्यो वि॒शां गा॒तुरे॑ति॒ प्र यदान॑ड्दि॒वो अन्ता॑न् क॒विर॒भ्रं दीद्या॑नः

Rk 5

जु॒षद्ध॒व्या मानु॑षस्यो॒र्ध्वस्त॑स्था॒वृभ्वा॑ य॒ज्ञे मि॒न्वन्त्सद्म॑ पु॒र ए॑ति

Rk 6

स हि क्षेमो॑ ह॒विर्य॒ज्ञः श्रु॒ष्टीद॑स्य गा॒तुरे॑ति अ॒ग्निं दे॒वा वाशी॑मन्तम्

Rk 7

य॒ज्ञा॒साहं॒ दुव॑ इषे॒ऽग्निं पूर्व॑स्य॒ शेव॑स्य अद्रेः॑ सू॒नुमा॒युमा॑हुः

Rk 8

नरो॒ ये के चा॒स्मदा विश्वेत्ते वा॒म आ स्युः॑ अ॒ग्निं ह॒विषा॒ वर्ध॑न्तः

Rk 9

कृ॒ष्णः श्वे॒तो॑ऽरु॒षो यामो॑ अस्य ब्र॒ध्न ऋ॒ज्र उ॒त शोणो॒ यश॑स्वान् हिर॑ण्यरूपं॒ जनि॑ता जजान

Rk 10

ए॒वा ते॑ अग्ने विम॒दो म॑नी॒षामूर्जो॑ नपाद॒मृते॑भिः स॒जोषाः॑ गिर॒ आ व॑क्षत्सुम॒तीरि॑या॒न इष॒मूर्जं॑ सुक्षि॒तिं विश्व॒माभाः॑