Sukta 97
Mandala 1 · 8 rks
8 rks · free forever
Listen to this section
Uses your saved HI voice · Narration settings
Rk 1
अप॑ नः॒ शोशु॑चद॒घमग्ने॑ शुशु॒ग्ध्या र॒यिम् अप॑ नः॒ शोशु॑चद॒घम्
Rk 2
सु॒क्षे॒त्रि॒या सु॑गातु॒या व॑सू॒या च॑ यजामहे अप॑ नः॒ शोशु॑चद॒घम्
Rk 3
प्र यद्भन्दि॑ष्ठ एषां॒ प्रास्माका॑सश्च सू॒रयः॑ अप॑ नः॒ शोशु॑चद॒घम्
Rk 4
प्र यत्ते॑ अग्ने सू॒रयो॒ जाये॑महि॒ प्र ते॑ व॒यम् अप॑ नः॒ शोशु॑चद॒घम्
Rk 5
प्र यद॒ग्नेः सह॑स्वतो वि॒श्वतो॒ यन्ति॑ भा॒नवः॑ अप॑ नः॒ शोशु॑चद॒घम्
Rk 6
त्वं हि वि॑श्वतोमुख वि॒श्वतः॑ परि॒भूरसि॑ अप॑ नः॒ शोशु॑चद॒घम्
Rk 7
द्विषो॑ नो विश्वतोमु॒खाति॑ ना॒वेव॑ पारय अप॑ नः॒ शोशु॑चद॒घम्
Rk 8
स नः॒ सिन्धु॑मिव ना॒वयाति॑ पर्षा स्व॒स्तये॑ अप॑ नः॒ शोशु॑चद॒घम्