Sukta 86

Rk 1

मरु॑तो॒ यस्य॒ हि क्षये॑ पा॒था दि॒वो वि॑महसः स सु॑गो॒पात॑मो॒ जनः॑

Rk 2

य॒ज्ञैर्वा॑ यज्ञवाहसो॒ विप्र॑स्य वा मती॒नाम् मरु॑तः शृणु॒ता हव॑म्

Rk 3

उ॒त वा॒ यस्य॑ वा॒जिनोऽनु॒ विप्र॒मत॑क्षत स गन्ता॒ गोम॑ति व्र॒जे

Rk 4

अ॒स्य वी॒रस्य॑ ब॒र्हिषि॑ सु॒तः सोमो॒ दिवि॑ष्टिषु उ॒क्थं मद॑श्च शस्यते

Rk 5

अ॒स्य श्रो॑ष॒न्त्वा भुवो॒ विश्वा॒ यश्च॑र्ष॒णीर॒भि सूरं॑ चित्स॒स्रुषी॒रिषः॑

Rk 6

पू॒र्वीभि॒र्हि द॑दाशि॒म श॒रद्भि॑र्मरुतो व॒यम् अवो॑भिश्चर्षणी॒नाम्

Rk 7

सु॒भगः॒ स प्र॑यज्यवो॒ मरु॑तो अस्तु॒ मर्त्यः॑ यस्य॒ प्रयां॑सि॒ पर्ष॑थ

Rk 8

श॒श॒मा॒नस्य॑ वा नरः॒ स्वेद॑स्य सत्यशवसः वि॒दा काम॑स्य॒ वेन॑तः

Rk 9

यू॒यं तत्स॑त्यशवस आ॒विष्क॑र्त महित्व॒ना विध्य॑ता वि॒द्युता॒ रक्षः॑

Rk 10

गूह॑ता॒ गुह्यं॒ तमो॒ वि या॑त॒ विश्व॑म॒त्रिण॑म् ज्योति॑ष्कर्ता॒ यदु॒श्मसि॑