Sukta 79

Rk 1

हिर॑ण्यकेशो॒ रज॑सो विसा॒रेऽहि॒र्धुनि॒र्वात॑ इव॒ ध्रजी॑मान् शुचि॑भ्राजा उ॒षसो॒ नवे॑दा॒ यश॑स्वतीरप॒स्युवो॒ न स॒त्याः

Rk 2

आ ते॑ सुप॒र्णा अ॑मिनन्तँ॒ एवैः॑ कृ॒ष्णो नो॑नाव वृष॒भो यदी॒दम् शि॒वाभि॒र्न स्मय॑मानाभि॒रागा॒त्पत॑न्ति॒ मिहः॑ स्त॒नय॑न्त्य॒भ्रा

Rk 3

यदी॑मृ॒तस्य॒ पय॑सा॒ पिया॑नो॒ नय॑न्नृ॒तस्य॑ प॒थिभी॒ रजि॑ष्ठैः अ॒र्य॒मा मि॒त्रो वरु॑णः॒ परि॑ज्मा॒ त्वचं॑ पृञ्च॒न्त्युप॑रस्य॒ योनौ॑

Rk 4

अग्ने॒ वाज॑स्य॒ गोम॑त॒ ईशा॑नः सहसो यहो अ॒स्मे धे॑हि जातवेदो॒ महि॒ श्रवः॑

Rk 5

स इ॑धा॒नो वसु॑ष्क॒विर॒ग्निरी॒ळेन्यो॑ गि॒रा रे॒वद॒स्मभ्यं॑ पुर्वणीक दीदिहि

Rk 6

क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ स ति॑ग्मजम्भ र॒क्षसो॑ दह॒ प्रति॑

Rk 7

अवा॑ नो अग्न ऊ॒तिभि॑र्गाय॒त्रस्य॒ प्रभ॑र्मणि विश्वा॑सु धी॒षु व॑न्द्य

Rk 8

आ नो॑ अग्ने र॒यिं भ॑र सत्रा॒साहं॒ वरे॑ण्यम् विश्वा॑सु पृ॒त्सु दु॒ष्टर॑म्

Rk 9

आ नो॑ अग्ने सुचे॒तुना॑ र॒यिं वि॒श्वायु॑पोषसम् मा॒र्डी॒कं धे॑हि जी॒वसे॑

Rk 10

प्र पू॒तास्ति॒ग्मशो॑चिषे॒ वाचो॑ गोतमा॒ग्नये॑ भर॑स्व सुम्न॒युर्गिरः॑

Rk 11

यो नो॑ अग्नेऽभि॒दास॒त्यन्ति॑ दू॒रे प॑दी॒ष्ट सः अ॒स्माक॒मिद्वृ॒धे भ॑व

Rk 12

स॒ह॒स्रा॒क्षो विच॑र्षणिर॒ग्नी रक्षां॑सि सेधति होता॑ गृणीत उ॒क्थ्यः॑