Sukta 37

Rk 1

क्री॒ळं वः॒ शर्धो॒ मारु॑तमन॒र्वाणं॑ रथे॒शुभ॑म् कण्वा॑ अ॒भि प्र गा॑यत

Rk 2

ये पृष॑तीभिर्ऋ॒ष्टिभिः॑ सा॒कं वाशी॑भिर॒ञ्जिभिः॑ अजा॑यन्त॒ स्वभा॑नवः

Rk 3

इ॒हेव॑ शृण्व एषां॒ कशा॒ हस्ते॑षु॒ यद्वदा॑न् नि याम॑ञ्चि॒त्रमृ॑ञ्जते

Rk 4

प्र वः॒ शर्धा॑य॒ घृष्व॑ये त्वे॒षद्यु॑म्नाय शु॒ष्मिणे॑ दे॒वत्तं॒ ब्रह्म॑ गायत

Rk 5

प्र शं॑सा॒ गोष्वघ्न्यं॑ क्री॒ळं यच्छर्धो॒ मारु॑तम् जम्भे॒ रस॑स्य वावृधे

Rk 6

को वो॒ वर्षि॑ष्ठ॒ आ न॑रो दि॒वश्च॒ ग्मश्च॑ धूतयः यत्सी॒मन्तं॒ न धू॑नु॒थ

Rk 7

नि वो॒ यामा॑य॒ मानु॑षो द॒ध्र उ॒ग्राय॑ म॒न्यवे॑ जिही॑त॒ पर्व॑तो गि॒रिः

Rk 8

येषा॒मज्मे॑षु पृथि॒वी जु॑जु॒र्वाँ इ॑व वि॒श्पतिः॑ भि॒या यामे॑षु॒ रेज॑ते

Rk 9

स्थि॒रं हि जान॑मेषां॒ वयो॑ मा॒तुर्निरे॑तवे यत्सी॒मनु॑ द्वि॒ता शवः॑

Rk 10

उदु॒ त्ये सू॒नवो॒ गिरः॒ काष्ठा॒ अज्मे॑ष्वत्नत वा॒श्रा अ॑भि॒ज्ञु यात॑वे

Rk 11

त्यं चि॑द्घा दी॒र्घं पृ॒थुं मि॒हो नपा॑त॒ममृ॑ध्रम् प्र च्या॑वयन्ति॒ याम॑भिः

Rk 12

मरु॑तो॒ यद्ध॑ वो॒ बलं॒ जनाँ॑ अचुच्यवीतन गि॒रीँर॑चुच्यवीतन

Rk 13

यद्ध॒ यान्ति॑ म॒रुतः॒ सं ह॑ ब्रुव॒तेऽध्व॒न्ना शृ॒णोति॒ कश्चि॑देषाम्

Rk 14

प्र या॑त॒ शीभ॑मा॒शुभिः॒ सन्ति॒ कण्वे॑षु वो॒ दुवः॑ तत्रो॒ षु मा॑दयाध्वै

Rk 15

अस्ति॒ हि ष्मा॒ मदा॑य वः॒ स्मसि॑ ष्मा व॒यमे॑षाम् विश्वं॑ चि॒दायु॑र्जी॒वसे॑